محمد جمعان الدوسري
بريق طيفٍ من الأمل شف مشهاي
برقت فيه ودمع عيني سواقي
والراس داوي والفكر لد ممشاي
ومن التعب زاد الوهن في خناقي
وزول الحنين إذا شرى كبل الراي
حتى يجي موج والدواكيك ساقي
حديث نفسٍ طاف بي وعاش وياي
أتنفسه مثل الهوى له تساقي
من وين ما يممتنا يتوه مسراي
في جب مكلومٍ حلومه أطباقي
تاخذني السجه إلى نقعة الماي
عليل وجدٍ ما لقى أي راقي
سنين مرت بي وأنا أسحب إخطاي
في فيضة أوهامٍ تروم انزلاقي
جرعة أمل مع حظ إلوق لمناي
وأنا على جرف الهوى لي طراقي
يا حظ قل لي ليه أنا رايحٍ جاي
واللي أبي ما رام وهج اشتياقي
تعال يا حظي على حد مرماي
لا صرت مهمومٍ وحلحل وثاقي
تلقى عليل من الوهن يعزف الناي
بلحنٍ حزينٍ ولاهب الحزن شاقي
ومن شادن الأحزان جريت بشداي
مسحوب بوحٍ ما بقى له بواقي
رغم الشجون ولفحت الهم مشكاي
لله وحده لا عناني اختناقي
والصبر زادي والرضا زاد تقواي
والحمد لله له في قلبي سواقي
