محمد جمعان الدوسري الدمام – الشرقية
مع ذكر المعاناة العظيمة والأمل ما غاب
بسير بمركبي في بحر حلمي وأرقب اللافي
وهو يقطع طريقه مع همومٍ أدوخ الألباب
أدور بحمل مكلومٍ ضعيفٍ ويجهل الخافي
وأنا ماني على لمم الحزون السانية حطّاب
يجمع من خشاش الأرض ما يخفى وينشافي
أزايم لي دواكيكٍ قوية مالها أبواب
وتدخل في فنا بيتي وتنصاني وأنا غافي
وهذي حالة المهموم لا فضفض بما ينتاب
فؤادٍ خافق الشاقي إذا داس الجمر حافي
أبشرب من صميل الصبر كاسٍ يحير الألباب
وبقعد أرقب لبكره قبل ما يسفه السافي
ومن اللي شفته وشلته وزايمته وعضّ الناب
سنين العمر مرمرني غثاها يا الله الكافي
خذيت من البصيرة جسر فكرٍ وزورقي ينساب
في لجة بحره الطامي يدور شاطئٍ دافي
عسى درب الرجا تفتح لمن أمسى وهو منصاب
من الآمال له بابٍ عن الأحزان روافي
وعسى الأيام تفتح له بأمر الله فرجة باب
وفضل الله كثير وخير ربي بالأمل وافي
أنا شعري بأسطر فيه للأيام ما قد ثاب
سوالف للزمن تروي حقيقة حالمٍ حافي
وبجلس في مهب الريح لا سجّيت وسط الغاب
وأطالع هاطله يجري وأحرك فيه مجدافي
ترى الأيام لو تقسى على شاقي لو إنه شاب
تخالفه البصيرة لين يمسي خايف اللافي
وترى الأهوال لو حطت على طفلٍ غدا سكراب
لو إنه شاب أو شايب تكدر جوه الصافي
عروض البوح لا أشرق على الشاعر يجي سكاب
ويأتي من سواقي البوح بين إجلالٍ وإرهافي
