بقلم: محمد جمعان الدوسري
تعبت ودلال الدواكيك فاحت
والحزن بهرها ولا أدري ومليت
وسجّيت حتى كبلتني ولاحت
لي من بعيد سهومها دون توقيت
يا حظّ وينك؟ الملاوي تلاحت
على العليل المبتلى لين ونيت
ونّيت يتيمٍ يتبع أمّه وراحت
عنّه وهو قاعدٍ في رجم السباريت
في مهمّةٍ نادٍ بعيدٍ استباحت
غوايله ولا درى وينه يبيت
وش هو الذي يمسح دموعه لطاحت
ومن التعب عجز يعود إلى البيت
ونفسه بما عانى من الوجد باحت
وطنّب بأعلى الصوت وجاوبه هيت
يا ليت نفسي من الهموم استراحت
وأنا صغيرٍ وقاعدٍ دون تثبيت
ولا شلت لي حملٍ شطونه أطاحت
بأحلام من يشرب من الحزن حلتيت
بغيت أعدّلها وتاهت وراحت
بحلوم غرٍّ في دحول العفاريت
يا حظّ من حاز الأماني لاحت
عزّ الله إنّه لابتسم وقته بخيت
