محمد جمعان الدوسري _ الدمام – الشرقية
يا أبوي لك في القلب هتّان ديمه
فيها تعاليل السنين الخوالي
برقت فيها للقلوب الرحيمه
أرسلت عبراتٍ هواها بدا لي
يومن لفت لي لك طلولٍ قديمه
وأطياف ذكرى فيها لا يزالِي
ضميتها والدمع يرزم رزيمه
من موق عيني والطواري سجالي
دمعٍ سواقي عبرته مستديمه
لاشفت لك صوره وزولك طرى لي
حتى فحيح الصدر تسمع رنيمه
مع حشرجات الحزن لو هو ختالي
يا جعلك الفردوس تسكن نعيمه
وفي رحمة الله منزلك في العوالي
وأمي معك بين المخايل مقيمه
وأفضال ربّي مالها من زوالي
يا أبوي دعوات المولى عظيمه
لكم تساقى يا كرام السبالي
مع ذكرياتٍ خلدتها رحيمه
لنا ولكم ما بين مرٍّ وحالي
تذكار يبقى للعقول الفهيمه
نبراس ذكرى لا غدا الراس خالي
