محمد جمعان الدوسري – الدمام / الشرقية
عسى الرفيق اللي يعرف المواجيب …………….
يشرب رحيق الخير كل ما تمناه
والشمس تشرق في مراحه ولا تغيب ….
ونهر السعد يفيض من كف يمناه
لأجله على المعروف للعاني قريب …..
يسيل مسياله على كل منحاه
طيبٍ يطيب بطيب من يعشق الطيب …..
وخذا شرابه من قليبٍ صفا ماه
بعض المواقف ما تبي أي تهذيب …..
فضلٍ من الله للذي طاب مجناه
وقفة تأمل ما تبي أي ترتيب…….
وأنا إذا شفت الشلي ما أتعداه
كم صاحبٍ في طلته شكله مهيب ….
وإذا عرفته خفت لا تقرب حماه
ومن طال عمره يلتحف بالتجاريب …..
من قبل ما ينبت حبله من رشاه
