محمد جمعان الدوسري _ الدمام _ المنطقة الشرقية
لا لج ذهني دوور الفكر تدوير
وإذا سرى بي ما أفختتني أخدوشه
هاجوس والهاجوس لا طَرَف يغير
على الموله لين سهمه ينوشه
واللي على درب الهوى صولته غير
مثل العليل اللي الهوى حاش حوشه
جاز الكلام وجاوبتني طوابير
من القصيد اللي فرش لي عروشه
والبوح له مع ضولة الوجد تبرير
لا طرّش المنجوم تالي طروشه
يا شوق خلك لا تنوشك خوابير
ولا مياسم لاهين طاش طوشه
القلب لامن نادمته التصاوير
ومشى معاها إن سرت به تدوشه
بين الحماد وبه تدور الأعاصير
والوجد لامن طاش تبقى خدوشه
واللي فتح له كوه ونافخ الكير
لا طاش سهمه له مع البوح هوشه
مره يصدر به ومره يجي مغير
ومره على رجم بعيد يطوشه
يا فيضة الغاوين مالك دواوير
على العليل اللي يحرك رموشه
ترى الهوى يطيّر الوجد تطيير
حتى تعلّم في الموله نقوشه
