محمد جمعان الدوسري_ الدمام المنطقه الشرقيه
الشعر للمشتاق والصب مشروع………….
وإذا جرى في مهجته جاه منصاع
وبيوت شعري لاسقت مثل ينبوع……..
يسري بسواقي البوح بكل الأوضاع
وإذا تلفانه الهوى وين ما يضوع……
باللي يطوف بخافقي كل ماراع
حتى يغيبني وأنا معه مطبوع……
على ترانيم الوله كلما فاع
بعض القصايد تاخذ اللب وتفوع……
مثل البذور إن داعبت كف زراع
الشعر مثل الروض في زروعه فروع…..
إذا شعقها الطيب بانواع وانواع
يطيش بالمشتاق والعالم هجوع……..
حتى يناجيه الهوى بكل الأوضاع
والبوح خفق القلب لاصار مسموع…….
في خلوة الملتاع والناس هجاع
حتى يباري الوجد ينبوع ينبوع……..
ويغرف فياض الشوق بكل إبداع
واللي سرى فيه الوله يذرف دموع……..
لصار دمدام الوله يضرب ايقاع
ترى بساتين الهوى دايم تروع……….
من شاهق(ن)عالي إلى أسفل القاع
نادمت وهج الروح وجيت له طوع…..
وأنا وغيري في هوى البوح جيياع
