وميض من سنا الذكرى


محمد جمعان الدوسري
الدمع في بعض التعلات ترياق…
للي يبرق في السنين الخوالي
واللي يتذكر غايبه كل ما ضاق….
وله من سنى الذكرى رجوم(ن)ثقالي
وانا مثلهم طارف الوجد براق…..
اطرد ورا ذكرى(ن) هواها قبالي
اشوف لي بيت(ن) سكناه ورواق……
اجلس في فييه والهوا راس مالي
واسامر الجدران والقلب خفاق…
واشوف شيبان(ن)نسمهم بدا لي
احد(ن)خذا له من فضا وجده ارواق….
واحد(ن)من الاحزان ماهوب خالي
واحد(ن)كتب له في فضاء الشوق ميثاق…..
فيه الوفا لذيك السنين الخوالي
هذاك ابويه يننفض الجهد والساق….
ممدودة(ن)والماي حوله زلالي
يشرب غبوقه في فضاوات مشراق..
البيت واحلامه تجوب المحالي
يلاحي السمار ويشوف ما راق…
له من هوى نفسه ولا كان بالي
وهذيك امي ووجهها يشرق اشراق…
رغم التعب اللي يهد الجبالي
وهج السنين يمر من بين الاحداق…
والبيت اطلال(ن)من الناس خالي
ماعاد في الحاره لا اصحاب و رفاق….
اللي رحل واللي سكن برج عالي
واللي غدا ذكرى لها القلب خفاق…….
تحت الثرى والحمل فوق احتمالي
امسى رسوم اطلالها بين الاورق…
يحفظ لهم ماض(ن) جميل(ن)وغالي
اطياف تاريخ وعيناه لي لاق…
دارت سواني دورته في الخيالي
وخذيت اهذري به ولي معه ميثاق..
اسامر التذكار لاجا قبالي